- Биз ўқитувчилар ҳар йилги Паёмни интизорлик билан кутамиз. Зеро, унда Давлатимиз бошлиғи барча халқ ўйлаб юрган, орзу истагидаги сўзларни айтадилар, фуқароларни меҳнат жабҳасида янада завқу шавққа тўлиб меҳнат қилишга чорлайдилар.

Меҳнаткашлар ҳуқуқини ҳимоя қилиш, улар иш ҳақларини юксалтира бориш тадбирларини амалга ошириш Республика Ҳукуматининг асосий мақсадларидан бири бўлиб қолмоқда. Кейинги беш йил ичида бюджет соҳасидагилар, жумладан, маориф ва илм, соғлиқни сақлаш, маданият, ҳуқуқни муҳофаза қилиш, аҳолини ижтимоий ҳимоялаш соҳалари ходимлари маошлари 2,5-3 бараварга ошганлигини кузатиш мумкин.

Бундан ташқари фуқаролар нафақалари ўрта ҳисобда 20 фоизга, студентлар стипендиялари 30 фоизга оширилишини Хукуматнинг  аҳолига алоҳида ғамхўрлиги, дея қабул қилдик.

Касбимиз ўқитувчилик бўлгани учунми, бизни кўпроқ Паёмнинг таълим-тарбияга оид жиҳатлари ўзига жалб этади. Муҳтарам Президентимизнинг ёшлар муносиб билим олишлари учун шароит яратиш ва уларни ҳар хил экстремистик гуруҳлар таъсирига тушиб қолиш олдини олиш чораларини кучайтириш борасидаги сўзлари айни муддао, деб биламан. Зотан, бу биринчи ўринда биз ўқитувчилар ва ота-оналар, қолаверса, бутун жамиятимиз зиммасидаги асосий вазифа бўлиб қолмоғи лозим. 

Давлатимиз сарвари томонидан Бола ҳуқуқи ҳимоясига доир ваколатдор институт таъсис этиш ташаббуси ҳам шахсан Президент Жаноби олийлари ҳамда Тожикистон Ҳукуматининг болалар келажаги борасида қайғуришларидан дарак беради.

Муҳтарам Президентимизнинг навбатдаги Паёми ҳам биз кутгандек самара берди. Бу қайта ҳам у кишининг бюджет соҳасидагиларга алоҳида эътибори бошқалар қатори биз маориф соҳаси ходимларини янада руҳлантириб, ёш авлодни ватанпарварлик руҳида тарбиялаб, замонавий билимлар беришга ва бу борада ҳормай-толмай меҳнат қилишга ундашлиги аниқ.

Садбаргхон НАЗИРОВА,

Рўдакий ноҳиясидаги

11-умумтаълим муассасасининг математика фани ўқитувчиси.