Давлат мустақиллиги йилларидаги миллий маданиятимиз ривожи Тожикистон Республикаси Олий Кенгашининг ХVI сессиясидан бошланади. Ўша пайтларда, нафақат, миллату давлатнинг ҳаёт-мамоти, балки тожик халқининг маданияти масаласи ҳам ҳал этилаётганди. Қувонарлиси шундаки, сессия ишида самарали қарорлар қабул қилиниши ҳамда миллатнинг оқил фарзанди Эмомали Раҳмоннинг қудрат тепасига келиши билан миллий маданиятимиз сақлаб

қолинди. Санъат ва маданият вакиллари қаторида халқнинг ўзи ҳам соҳа тараққиётида фаол иштирок этаётганлигининг гувоҳи бўлиб турибмиз. Кундан кунга халқни маданий тадбирларга жалб этиш кўпайиб, замонавий иншоотлар бунёди, аждодларимиз анъаналарини қайта тиклаш, бой миллий маданиятимизни тарғиб этиш ва соҳа турли йўналишлари ривожидаги моддий заминаларни муҳайё этиш кўзга ташланмоқда.

Айни пайтда, республика миқёсида 2351та ижтимоий-маданий муассасалар фаолият юритмоқда. Фақатгина охирги 5 йил ичида мамлакатда 16та маданият уйлари, 5та музей, 13та кутубхона бунёд этилди.

Мустақиллик даврининг энг яхши меваларидан ҳисобланган Тожикистон Миллий консерваторияси, Хореография коллежи, Маданият ва ахборот миллий тадқиқот маркази, Тожикистон Давлат тасвирий санъат ва дизайн институтининг ташкил этилиши, мусиқа асбобларининг таъмири ва қайтадан фойдаланишга топширилиши Миллат пешвосининг маданият соҳаси тараққиётига кўрсатаётган ғамхўрликларининг нишонасидир. Бу даврда Тожикистон ҳудудидаги 506та маданий намуналарни ўз ичига олган номоддий маданий мерос миллий рўйхати биринчи марта нашр этилди. Ушбу рўйхатдаги бир нечта номинациялар, жумладан «Ош-палов» ва «Шашмақом» ЮНЕСКОнинг номоддий маданий рўйхатига киритилди.  Яқинда Франциянинг Париж шаҳрида ўтказилган ЮНЕСКО Бош конференциясининг 39-мажлисида Меҳргон байрами тожик халқининг номоддий маданий мероси сифатида қабул қилинди. Соҳа ходимлари, айни пайтда, «Чакан» ва «Фалак» номинацияларини рўйхатга киритиш учун таклиф йўллашган.

Маданият вазирлиги томонидан «Тожикистон Республикаси моддий ёдгорликлари рўйхати» лойиҳаси тайёрланиб, мамлакат Ҳукуматига тавсия этилган. Бугунги кунгача ЮНЕСКО умумжаҳон маданий мероси рўйхатига киритилган моддий ёдгорликлардан 17тасини тарихий ва маданий ёдгорликлар ташкил этади. Бу эса, жуда тенгсиз ютуқдир. Зеро, биз шу йўл билан миллий маданиятимизнинг баъзи унсурларини дунё миқёсида таништириш ва тарғиб этишга эришдик.

Айни пайтда республикамизда 46та радио-телевидение каналлари фаолият юритмоқда. Булардан 28таси хусусийдир. Шунингдек, эфир вақти телевидение каналлари учун 12-18 соат ва радио каналлари учун 24 соат белгиланган.

Қувонарлиси шундаки, республиканинг турли ноҳияларида маданий иншоотлар қурилиши давом этмоқда. Шундай муассасалардан бири Миллий театр ҳисобланади. Унинг тамал тошини Миллат пешвоси муҳтарам Эмомали Раҳмон пойтахтнинг маданият ва санъат аҳли вакиллари иштирокида тантанавий вазиятда қўйган эди. Миллий кутубхона ва музей ёнида қад кўтарадиган бу театр бундан кейин маданиятсевар тожик халқининг маънавий эҳтиёжларини қондирадиган улкан маърифат ва тарбия маркази сифатида хизмат қилади. 

Мамлакат маданият аҳли вакиллари улкан ютуқларни қўлга киритган ҳолда, юртимиз халқининг маънавий ва маданий даражасини юксалтириш борасида ўз ҳиссаларини қўшиш йўлида доимий интилиб келади.

Азизмурод ШАРИФОВ,

Тожикистон Республикаси Маданият вазирлиги ходими.