Ёхуд полиомиелитнинг олдини олиш хусусида

Ота-оналар учун фарзандларининг саломатлиги биринчи ўринда туради. Зеро, соғлом бола миллатнинг келажаги, соғлом жамият пойдеворидир. Бу тўғрида Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмоннинг мамлакат Олий мажлисига йўллаган Паёмида ҳам алоҳида таъкидланган.

Мамлакатимизда ҳам болалар соғлиғини сақлаш йўлида бир талай ишлар

амалга ошириб келинмоқда. Лекин соппа-соғ туғилган боланинг саломатлигига хавф солувчи касалликлар ҳам талайгина. Полиомиелит (фалаж) ана шундай касалликлар сирасига киради. Агар бола ўз вақтида эмланмаса, унда бу касаллик ривожланиши эҳтимоли ошиб боради.

Полиомиелит – бу марказий асаб тизими, биринчи навбатда, орқа мияга зарар етказувчи вирусли касаллик бўлиб, фалажни келтириб чиқариши мумкин. Бемор киши билан бир жойда туриш (бошқаларга қўл, рўмолча, кийим-кечаклар) орқали юқиши мумкин. Шунингдек, озиқ-овқат маҳсулотлари, сув ва ҳаводан ҳам тарқалади.

Фалаж касаллиги олдини олишнинг энг самарали усули – бу ОПВ (оғизга томизиладиган полиовакцина) ва ИПВ (инактивлаштирилган - ҳаракатсизлантирилган полиовацина) вакциналари билан ўз вақтида эмлаш ҳисобланади.

Тожикистон Республикаси Миллий иммунизация тақвимига янги вакцина тури киритилди. Полиомиелитга қарши ИПВ билан эмлаш юртимизда 2018 йилнинг 4 июнидан жорий этилди.

Мамлакат Соғлиқни сақлаш ва аҳолини ижтимоий ҳимоялаш вазирлиги қошидаги «Республика иммунопрофилактика маркази» давлат муассасасида бўлиб ўтган матбуот конференциясида вазир ўринбосари Мирҳамуддин Камолзоданинг таъкидлашича, янги вакцинани қўллаш полиомиелит тарқалиши олдини олиш йўлида муҳим қадам ҳисобланиб, минглаб болаларни ногиронликдан қутқаришга ёрдам беради.

Қайд қилиш жоизки, миллий тақвимга биноан, бола туғилганидан кейин 24 соат мобайнида полиомиелитга қарши ОПВ вакцинасини олади. Инактивлаштирилган полиовакцина болаларга тўрт ойлигида жўнатилади. ИПВ ва ОПВ биргаликда полиомиелитдан анча ишончли ҳимоя қилиб, уларнинг ҳар бири бола иммунитети мустаҳкамланишида турли хил рол ўйнайди. ИПВ қондаги иммунитетни мустаҳкамласа, ОПВ ичакдаги иммунитетни кучайтиради. Иккала вакцинадан бир вақтда фойдаланиш полиомиелитдан ҳимоялашнинг энг яхши шаклини таъминлайди.

Инактивлаштирилган полиовакцина – бу суюқ суспензия бўлиб, таркибида ўлдирилган полиовирус мавжуд. У барча уч турдаги полиовирусдан ҳимояланишни таъминлайди.

Аёллар орасида: - Боламни эмлатишдан воз кечдим. Бу вакциналар баъзида боланинг соғлиғига зарар етказар экан. Бола эмланганидан кейин иситмаси кўтарилиб кетганининг кўплаб гувоҳи бўлганмиз. Мана, боламни эмлатганим йўқ. Ҳеч қандай муаммоси йўқ, катта бўлаяпти,- деган гаплар ҳам қулоққа чалиниб туради.

Матбуот анжуманида шу масала кўтарилганида, қуйидагича жавоб берилди:

-Биз бола организми полиомиелитга қарши иммунитет ишлаб чиқиши учун бу вирусни жўнатамиз. Бунда боланинг иситмаси кўтарилиши табиий ҳол. Бу вакцина ўз таъсирини ўтказганидан дарак беради. Шу йўл орқали бола организмида ушбу касалликка қарши иммунитет ишлаб чиқилади. Саломатлигига салбий таъсир кўрсатаркан, дея эмлашдан воз кечиш эса нотўғридир. Бу билан боланинг саломатлиги сақланмайди, балки полиомиелитга чалиниш хавфи остида қолади.

Республика барча тиббий муассасаларида эмлаш тажрибали дўхтирлар томонидан бепул ўтказилади. Даволаниши фақат қайта тиклашга йўналтирилган фалаж касали табобати маблағига келадиган бўлсак, у қарийб 8025 Америка долларига тенг бўларкан. Тарозининг бир палласида бепул эмлаш ва иккинчи палласида 8025 доллар сарфлаган ҳолда ҳам, боланинг тўлиқ саломатлигини тиклашга эриша олмаслик турибди. Тарозининг қайси палласини танлаш эса, ота-оналарнинг ўзларига ҳавола.

Г. Аюпова,

«Халқ овози».