Тожикистон чемпиони Душанбенинг «Истиқлол» жамоаси мавқеи жиҳатдан Осиё клублари ўртасида иккинчи нуфузга эга бўлган «Осиё футбол конфедерацияси кубоги-2015» турнирининг саралаш даври гуруҳ босқичидаги 2-тур ўйинини ўтказди.

Мубин Эргашев шогирдлари Туркманистон пойтахти Ашхобод шаҳрида маҳаллий «Аҳал» жамоасига қарши майдонга тушишди.

Пойтахтликлар ярим ҳимоячилари Фатҳулло Фатҳуллоев ва Хуршид Маҳмудовлар киритган иккита тўпга мезбонлар битта гол билан жавоб қайтаришди. Ўйин 2:1 ҳисобида тожикистонликлар фойдасига ҳал бўлди.

«С» гуруҳидаги бошқа жуфтлик «Ал-Қудсия» (Қувайт)-«Эрбил» (Ироқ) ўртасидаги учрашув 1:0 ҳисобида майдон эгалари устунлиги билан тугади. Ўтказилган икки турдан сўнг, 6 очко жамғарган «ОФК кубоги»нинг ўтган мавсумдаги совриндори «Ал-Қудсия» гуруҳ пешқадами бўлиб турибди.

Гуруҳ босқичининг 3-тури 18 мартда ўтказилади, шу куни истиқлолчилар қувайтликлар меҳмони бўлишади.

МАВҚЕ ТОБОРА ПАСТЛАБ БОРМОҚДА

Халқаро футбол ассоциациялари федерацияси (ФИФА) жаҳон терма жамоалари мавқеини белгилаб берувчи янги рейтинг-варақасини эълон қилди.

Унинг натижаларига кўра, 192 очко тўплаган Тожикистон миллий терма жамоаси тўрт поғона пастлаб, эгаллаб турган 137-ўриндан 141-жойга тушиб кетди.

Осиё футбол конфедерациясига аъзо 46 та терма жамоалар ўртасида эса, 20-жойни эгаллаб турибди.

Соҳа мутахассисларининг таҳлил қилишларича, Малдив (26 март) ва Сурия (31март) терма жамоалари билан ўтказиладиган ўртоқлик учрашувларида футболчиларимиз ғалаба қозонишса, уларнинг мавқеи тикланиши мумкин. Акс ҳолда, «Жаҳон чемпионати-2018» турнирининг саралаш босқичи учун ўтказиладиган қуръа ташлаш маросимида Тожикистон термаси 4-корзинага жойлаштирилади.

---------------    Шаҳмат    ---------------

«ДОНА СУРУВЧИ»ЛАРИМИЗ «TOSHKENT OPEN»ДА

Тошкент шаҳрида шаҳмат бўйича Ўзбекистоннинг биринчи гроссмейстери Георгий Аъзамов хотирасига бағишланган «Toshkent Open-IX» халқаро турнири бўлиб ўтди.

Халқаро турнирда Испания, Россия, Белорус, Озарбайжон, Арманистон, Украина, Қозоғистон, Тожикистон ва Афғонистон сингари давлатларнинг 100 нафардан ортиқ шаҳматчилари ғолиблик учун кураш олиб борди.

Мусобақаларда иштирок этган мамлакатимиз терма жамоаси таркиби қуйидаги шаҳматчилардан иборат: Икром Иброҳимов, Неъмат Зиёев, Алишер Каримов, Надежда Антонова, Муҳаммад Юнусов, Тимур Исмоилов, Дониёр Мавлонов ва Абутолиб Раҳмониён.

Эслатиб ўтиш жоизки, тожикистонлик шаҳматчи, халқаро гроссмейстер Фаррух Амонатов бир марта мазкур турнирда ғолиб чиққан.

ҚИТЪА ЧЕМПИОНАТИ АМИРЛИКЛАРДА ЎТАДИ

Футбол бўйича 2019 йилда ўтказилиши режалаштирилган Осиё кубоги мусобақаларига Бирлашган Араб Амирликлари мезбонлик қиладиган бўлди.

Осиё футбол конфедерацияси ижроия қўмитасининг Баҳрайнда бўлиб ўтган мажлиси шундай қарорга келди.

Ижроия қўмита мажлисида қитъа чемпионати ўтказилиши тартибига ҳам айрим ўзгартиришлар киритилди.

Осиё футболи тарихида илк марта бу турнирда 24та терма жамоа қатнашади.

Таъкидлаш жоизки, футбол бўйича «Осиё кубоги-2015» турнири жорий йил январ ойида Австралияда бўлиб ўтди ва унда ғолиблик майдон эгалари- «яшил қитъа»ликларга насиб этди.

--------------    Оғир атлетика    --------------

ҚОЗОҚ ВАКИЛИ - ЭНГ ЯХШИ СПОРТЧИ

Қозоғистонлик Иля Илин ўтган 2014 йилдаги дунёнинг энг яхши оғир атлетикачиси, деб топилди.

Мамлакат оғир атлетика федерацияси интернет сайти бу ҳақдаги хабарни тарқатди.

Аёллар ўртасида эса, Россия намояндаси Татяна Каширина айнан шундай мавқега эга бўлди.

Ҳар икки давлат спортчилари фаолиятининг бундай юқори баҳога сазовор бўлишига, Олмаота шаҳрида бўлиб ўтган жаҳон чемпионати мусобақалари жараёнида улар томонидан дунё рекордларининг бир неча бор янгилаганлиги асос, деб топилди.

---------------    Бокс    ---------------

ҲИМОЯ ЖАНГИ ОМАДЛИ ЯКУНЛАНДИ

Касбий бокснинг IBF(Халқаро боксчилар федерацияси), WBА (Бутунжаҳон боксчилар ассоциацияси), WBO(Бутунжаҳон боксчилар ташкилоти) йўналишлари бўйича амалдаги жаҳон чемпиони, россиялик Сергей Ковалёв ўзининг чемпионлик камарини илк бор ҳимоя қилди.

Монреал шаҳрида бўлиб ўтган жангда у ижтимоий келиб чиқиши ганалик бўлган, аммо Канада байроғи остида чиқиш қиладиган Жан Паскалга қарши рингга кўтарилди.

Муштлашув россиялик боксчи устунлигида бошланди. Саккизинчи уч минутликка келиб эса, нокаут ҳолатидан сўнг, ринг ҳаками жангни тўхтатиб, чемпионликка даъвогарнинг мағлуб бўлганини маълум қилди.

«Халқ овози»нинг спорт шарҳловчиси.