Тожикистон Республикаси Ҳукумати қошидаги Ижтимоий суғурта ва нафақа агентлигининг ўтган йил якунига бағишланган матбуот конференцияси бўлиб ўтди. Унда агентлик директори биринчи ўринбосари Одиназода Назокат Хайрулло йил давомида амалга оширилган ишлар борасида тўхталиб ўтди.

Таъкидланишича, ўтган йилда ижтимоий суғурта ва нафақа бюджетига  2 миллиард 135,9 миллион сомоний киритилган бўлиб, 2015 йилдагига нисбатан 68,4 миллион сомоний ёки 1,1 фоизга зиёддир.

2016 йилда нафақа ва ижтимоий ёрдам пули тўлаш тасдиқланган режа асосида амалга оширилган. Бу даврда нафақа ва ижтимоий ёрдам пулини ўз вақтида тўлаш учун агентликнинг марказлаштирилган маблағлари ҳисобидан вилоят, шаҳар ва ноҳияларга  429,8 миллион сомоний ажратилган.

Республикамизда нафақа олувчиларнинг умумий сони 642927 нафарни ташкил қилиб, ўтган йилгига нисбатан 17466  нафар ёки 2,8 фоизга зиёддир. Нафақахўрлардан 144622 нафари эса, ногиронлик нафақасини олувчилар ҳисобланади.

Ўртача меҳнат нафақаси 274 сомоний, суғурта нафақаси 284 сомоний ва ижтимоий нафақа 144 сомонийни ташкил қилади.

- Тожикистон Республикаси Ҳукумати қошидаги Ижтимоий суғурта ва нафақа агентлиги, Тожикистон Республикаси Соғлиқни сақлаш ва аҳолини ижтимоий ҳимоялаш вазирлиги ва Тожикистон Республикаси "Амонатбонк" давлат омонат банкининг биргаликдаги буюртмаларига асосан, 2017 йилнинг 1 январигача 69627 нафар ногиронлик нафақасини олувчилар такрорий ижтимоий ва тиббий кўриклардан ўтказилиб, улардан 51763 нафарининг ногиронлик гуруҳлари тасдиқланди,- деди агентлик директори биринчи ўринбосари Одиназода Назокат Хайрулло.

Унинг сўзларига кўра, такрорий ташхисдан ўтказилган 6597 нафар бир ногиронлик гуруҳидан бошқа ногиронлик гуруҳига ўтказилиб, нафақалари ўша ногиронлик гуруҳи асосида тўланмоқда.

Шунингдек, Тожикистон Республикаси Соғлиқни сақлаш ва аҳолини ижтимоий ҳимоялаш вазирлигининг Тиббий ва ижтимоий ташхис давлат хизмати томонидан 2017 йилнинг 1 январигача ўтказган ташхислари натижаларига кўра, 17864 нафар кишиларда ногиронлик гуруҳи аниқланмаган. Улардан 5017 нафари нафақа ёшига етганлиги туфайли нафақага чиқишган. Қолган 12847 нафарнинг ногиронлик гуруҳлари тасдиқланмагани боис, нафақа тўловлари тўхтатилган. 

2017 йилда ҳам Тожикистон Республикаси Ҳукумати қошидаги Ижтимоий суғурта ва нафақа агентлигининг ходимлари Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмоннинг 2016 йил 22 декабрдаги Паёмида белгиланган кўрсатмаларни  ўз вақтида ижро этишни  фаолиятларининг асосий йўналишларидан бири ҳисоблаб, нафақахўрларга яхши хизмат кўрсатиш шароитларини яратиш борасида чора-тадбирлар кўришлари таъкидланди. 

Тадбир давомида агентлик вакиллари оммавий ахборот воситалари ходимларининг саволларига атрофлича жавоб беришди.

Садоқат Абдуразоқова,

"Халқ овози".