Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон томонидан 2018 йил Сайёҳлик ва халқ ҳунармандчилигини ривожлантириш йили, дея эълон қилинганлиги муносабати билан Деваштич ноҳиясида ҳам чора-тадбирлар режаси тузилиб, бир қатор самарали ишлар олиб борилмоқда.

Бугунги кунда ноҳиянинг Ваҳдат қишлоқ жамоатидаги Метк ва Овчи қишлоқларидаги “Чилдухтарон”, Сурхоб қишлоғидаги “Саричашма”, Угук қишлоғидаги ориёийлар давридан қолган тошдаги ёзув ҳамда Далёни Боло қишлоғидаги “Шаршара” сайёҳлар диққатини ўзига тортиб келади. Шунингдек, Туркистон тизма тоғларидаги нодир ҳайвонот олами, турли ўсимликлар, арчазорлар ва мусаффо чашмалар ноҳияда сайёҳликни янада ривожлантиришга имкон беради.  

Айни пайтда, Мажнун қишлоқ жамоатидаги Зароб қишлоғида “Чашма” дам олиш маскани фаолият юритмоқда. У икки сменада 200 болани қабул қилиш имкониятига эга. Унда, асосан, камтаъминланган оилалар фарзандлари ҳамда ўрта умумтаълим муассасалари ўқувчилари дам олишлари мумкин.

Ноҳияда халқ ҳунармандчилигини ривожлантиришга ҳам етарли шароитлар яратиб берилган. Масалан, ноҳияда 5та тикувчилик цехи, 13та гилам, 16та атлас ва адрас тўқишга ихтисослашган ўқув-ишлаб чиқариш марказлари таъсис этилган бўлиб, уларда 61та тўқув ускуналари ўрнатилган.

Халқ ҳунармандчилигини ривожлантириш мақсадида маҳаллий тадбиркорлар, жумладан, Гулчеҳра Холматова, Муҳаббат Маҳмудова, Тўҳфа Назаралиева, Ҳабиба Ғозиева, Моҳира Раҳматуллоева, Хайринисо Маҳкамова, Саноат Нуруллоевалар вилоят раисининг 5000дан 10000 сомоний миқдоригача гарантларидан фойданишмоқда.

Яратиб берилаётган имкониятлару доимий қўллаб-қувватлаш сайёҳлик ва халқ ҳунармандчилиги соҳаси ривожига ҳисса қўшиб, кишиларни муносиб иш ўринлари билан таъминлашга имконият беради.

Маратжон ЖАББОРОВ,

Деваштич ноҳияси.