Халқаро енгил атлетика федерациялари ассоциацияси расман биринчи марта босқон ирғитувчиларнинг бутунжаҳон рейтингини эълон қилди.

Тожикистон енгил атлетикасининг лидери, олимпиада чемпиони Дилшод Назаров бу нуфузли мавқе рўйхатининг кучли бешлигидан жой олди.

Рейтинг рўйхатининг биринчи поғонасини полшалик Павел Файдек эгаллаб турибди. У мавсумда 1362 балл тўплаган.

Иккинчи ўринда унинг ватандоши Войцех Новицкий (1288 балл) бормоқда. Фахрий учликдан Франция вакили Квентин Бигот (1256 балл) ҳам жой олган.

Тўртинчи ўрин эса, россиялик Валерий Пронкинга (1249 балл) насиб этган.

---------    Яккакураш    ---------

ЕВРОПАДАН ЕТТИТА ОЛТИН МЕДАЛ

Чехия Республикасида Шарқ яккакурашининг каратэ тури бўйича ўсмирлар ва ёшлар ўртасида Европа очиқ чемпионати ва Жаҳон кубоги турнирлари бўлиб ўтди.

Мусобақаларда дунёнинг 18 давлатидан 400 нафардан зиёд спортчи ғолиблик учун ўзаро кураш олиб борди.

Тожикистон Республикаси Миллий олимпиада комитетидаги манбанинг маълум қилишича, мамлакатимиз ўсмир ва ёшлари бу беллашувларда муваффақиятли чиқиш қилишган.

Ўсмирлар ўртасида кечган куч синашишларда намояндаларимиз Асадбек Фаттоев, Ҳожиқурбон Маҳмадов ҳамда Умид Сафаровлар иккитадан олтин медалларни қўлга киритишган.

Ўн саккиздан юқори ёшдагилар орасида эса, Бадриддин Умидов олтин медал совриндори бўлган.

---------    Футбол    ---------

«ПАНЖШЕР» ОЛИЙ ЛИГАДА ҚОЛДИ

Олий лига жамоалари ўртасидаги Тожикистон чемпионати турнир жадвалининг еттинчи ва биринчи лига клублари ўртасида иккинчи ўринларни ишғол этган Жалолиддин Балхий ноҳиясининг «Панжшер» ва Хўжанд шаҳрининг «Эсхата» жамоалариаро юқори дивизион йўлланмасини қўлга киритиш учун «тўқнаш» учрашувининг жавоб ўйини бўлиб ўтди.

Ўзаро ҳисоб-китобда панжшерчиларнинг қўли (3:2) баланд келди ва улар олий лигада «жон сақлаб қолишди».

Эслатиб ўтамиз: «тўқнаш» учрашувининг Хўжанд шаҳрида бўлиб ўтган дастлабки ўйинида дуранг кўринишидаги- 1:1 ҳисоби қайд этилган эди.

======    Жаҳонда    ======

---------    Теннис    ---------

«ДЭВИС КУБОГИ» - ФРАНЦИЯ ВАКИЛЛАРИДА

Франциянинг Вилнев-д Аска шаҳрида теннис бўйича эътиборли халқаро мусобақалардан бири «Дэвис кубоги» турнири якун топди.

Турнирнинг бош совринини майдон эгалари францияликлар ўзларида олиб қолишди.

Франция термаси финал босқичининг ҳал қилувчи учрашувида белгияликларга қарши кортга чиқди ва 3:2 ҳисобида ғалаба қозонди.

Финал босқичининг бешинчи учрашувида рақиби белгиялик Стив Дарсини 6:3, 6:1, 6:0 ҳисобида доғда қолдирган француз теннисчиси Лука Пуи ўз терма жамоаси ютуғига муносиб улуш қўшди.

Ўтган 2016 йилда «Дэвис кубоги» турнири ғолиблиги аргентиналикларга насиб қилган эди. Улар ҳал қилувчи босқичда хорватияликлардан устун келишганди.

---------    Футбол    ---------

«УРАВА» - ЧЕМПИОНЛАР ЛИГАСИ ҒОЛИБИ

Японияда футбол бўйича Осиё чемпионлар лигаси ғолибини аниқлаб берувчи финал учрашуви ўтказилди.

Унда Япониянинг «Урава Редс» ва Саудия Арабистонининг «Ал-Ҳилол» жамоалари «яшил майдон»га тушди.

Ўйин шиддатли кечди. Асосий вақт тугашига икки дақиқа қолганида, «Урава Редс» аъзоси Рафаэл Силва киритган ягона гол бош соврин тақдирини ҳал қилди.

Шундай қилиб, японияликлар 2017 йил мавсумида Осиё чемпионлар лигаси турнири ғолибига айланишди.

Япония терма жамоаси ва «Урава Редс» клубининг ўйинчиси Йосуке Кашиваги Осиё чемпионлар лигасининг энг яхши футболчиси, дея эътироф этилди.

---------    Баскетбол    ---------

«ТЕНЕРИФЕ»ДА ЯНГИ БОШ МУРАББИЙ

Испаниянинг «Тенерифе» клубига Фотис Кацикарис янги бош мураббий этиб тайинланди.

Грециялик 50 ёшли мутахассис ва баскетбол жамоаси ўртасида имзоланган келишув мавсум охирида тугайди.

Фотис Кацикарис илгари Россия терма жамоаси, шунингдек, Санкт-Петербургнинг «Динамо» ва Краснодарнинг «Локомотив-Кубан» клубларини ҳам бошқарган.

У фаолиятининг кейинги даврида Исроилнинг «Хапоэл» жамоасига устозлик қилиб келаётган эди.

«Халқ овози»нинг спорт шарҳловчиси.