8 апрел куни Тинчлик ва миллий бирлик асосчиси – Миллат пешвоси, Тожикистон Республикаси Президенти, мамлакат Ҳукумати Раиси Эмомали Раҳмон бошчилигида Тожикистон Республикаси Ҳукумати ва Тожикистон Республикаси давлат мустақиллиги 25 йиллигини нишонлаш бўйича Ташкилий комитет муштарак мажлиси бўлиб ўтди.  

Тожикистон Республикаси Президенти Матбуот хизматидан маълум қилишларича, мажлис чоғида жорий йил биринчи уч ойи учун давлат бюджети ижросининг бориши, Тожикистон Республикаси Ҳукуматининг 2015 йил 31 январдан «Тожикистон Республикаси давлат мустақиллиги 25 йиллигини нишонлаш тўғрисида», 2015 йилнинг 19 декабридан «Миллий бирлик куни ва Тожикистон Республикаси давлат мустақиллиги 25 йиллигини нишонлаш бўйича республикавий тантаналарни ўтказиш тўғрисида»ги қарорлари ижроси ҳамда CASA-1000 электр узатиш линияси минтақавий лойиҳаси тамал тошини қўйишга тайёргарлик билан боғлиқ тадбирлар ижроси муҳокама қилинди.

Тожикистон Республикаси Молия вазири Абдусалом Қурбониённинг ҳисоботида 2016 йилнинг биринчи уч ойлигида бюджет даромад қисми 93,5 фоизга ижро этилиб, бюджетга 3,4 миллиард сомоний маблағ келиб тушгани қайд қилинди. Давлат бошлиғи бир қатор вазирликлар ва ҳукумат идоралари, давлат муассасалари раҳбарларига бюджет даромад қисми ва бошқа тўловларни тўлиқ ижро этиш учун амалий чораларни қўллаш топшириғини берди.

Мамлакат Президенти Бош вазир Қоҳир Расулзода ва республика бошқа масъул шахсларининг давлат улкан байрамларини нишонлашга тайёргарлик ҳақидаги ҳисоботларини тинглар экан, тайёргарлик ишларини кенгайтириш, ободончилик бўйича ишлар олиб борилишини тезлаштириш ва сифатли ўтказиш ҳамда бошқа маданий-сиёсий чоралар ижроси ҳақида аниқ топшириқлар берди.

Бу йирик миллий байрам доирасида мамлакат халқи учун яқин ойларда йиллик ишлаб чиқариш иқтидори 1 миллион 200 минг тонна цементни ташкил қилувчи цемент заводи, йилига 3 миллион дона гипсокартон ишлаб чиқарувчи корхона, Хатлон вилоятининг Ёвон ноҳиясида криолит, фторид алюминийси ва сулфат кислотаси ишлаб  чиқариш корхонаси, Ваҳдат шаҳрида олтин қазиб олиш бўйича корхона, Данғара ноҳиясида 52 минг тонна пахта толасини қайта ишлаш иқтидорига эга йигирув корхонаси, Фархор ноҳиясида 4 минг тонна пахта толасини қайта ишлаш иқтидорига эга йигирув корхонаси, Ҳисор шаҳрида йилига 150 минг тонна иқтидорли металлургия комбинати, Ваҳдат-Ёвон темирйўли участкаси, «Душанбе-2» иссиқлик-энергия маркази иккинчи корпуси ҳамда бошқа муҳим иншоотлар қурилиб фойдаланишга топширилиши бу муҳим давлат байрамини нишонлаш кунларида муносиб совға бўлиши  қайд қилинди.

Умуман, юбилей йилида саноатни ривожлантириш учун 161 корхона фойдаланишга топширилиб, бу ерда ўн мингдан зиёд янги иш жойлари яратилади.

Миллий байрам арафасида республика шаҳру ноҳияларида 155та таълим муассасалари, 46та спорт иншооти, 8та тиббий муассаса, 9та энергетик иншоот ва 8та транспорт соҳаси иншооти қурилиб, фойдаланишга топширилади.

CASA-1000 электр узатиш линияси минтақавий лойиҳаси тамал тошини қўйиш билан боғлиқ тадбирлар ижросининг бориши ҳақида мамлакат Энергетика ва сув захиралари вазири Усмонали Усмонзоданинг ҳисоботи тингланди. Мамлакат Президенти муҳтарам Эмомали Раҳмон Ҳукумат масъул шахслари, тегишли тузилмалар раҳбарларига бу минтақавий даражадаги тадбир ўтказилишига доир аниқ топшириқлар берди.

Мажлис охирида Миллат пешвоси Эмомали Раҳмон Ташкилий комитет аъзолари ва бошқа масъул шахсларга Тожикистон Республикаси давлат мустақиллиги 25 йиллиги ва Миллий бирлик каби муҳим тарихий саналар билан боғлиқ тадбирларни қабул қилиш ҳамда уларнинг бутун мамлакат бўйлаб ижро этилишини халқ тантанали юришини ташкил қилиш орқали ўз вақтида таъминлаш топшириғини берди.

«Ховар» ТМАА.