Юртимизда - баҳор. Баҳор - яшариш, янгиланиш фасли, бунёдкорлик ва ободончилик мавсуми, улкан мақсадларни рўёбга чиқариш учун белни маҳкам боғлайдиган палла. Олдинда эса, Наврўз шодиёналари. Ҳар гўшада - байрам, ҳар бир кишида байрамона кўтаринки кайфият.

Яқинда аср қурилиши, юртимизнинг улкан гидроэнергетик иншооти - Роғун ГЭСи қурувчиларига ана шундай баҳор нафаси,

байрамона кайфият улашиш мақсадида, пойтахтдан бир гуруҳ тарғибот гуруҳи Роғун шаҳрида бўлишди.

Тожикистон Республикаси Президентининг ижтимоий тараққиёт ва жамоатчилик билан алоқалар масалалари бўйича ёрдамчиси Абдужаббор Раҳмонзода бошчилик қилган гуруҳдан бир қатор вазирлигу идоралар раҳбарлари, Тожикистон Халқ демократик партияси Марказий комитети, Жамоатчилик кенгаши, Тожикистон Миллий бирлик ва қайта тикланиш ҳаракати аъзолари, шоирлару ёзувчилар, рассомлар, театр ва кино соҳаси вакиллари, журналистлар ҳамда Тожикистон Давлат филармонияси артистлари ўрин олишган эди.

Роғун шаҳридан ГЭС қурилиш майдони томон борар эканмиз, бу ерда олиб борилаётган ишларни кўриб, ҳайратимиз ошди, қурувчилар - замонамиз қаҳрамонлари заҳматига офаринлар айтдик.

Тарғибот гуруҳи аъзоларини Роғун ГЭСи масъуллари ўзига хос хурсандчилик билан қарши олишди. Биз эса, олдиндан белгиланган режага биноан, уч гуруҳга бўлиниб, иншоотнинг турли объектлари ва қурувчилар ёнига шошдик. Тожикистон Давлат филармонияси артистлари ҳам асбоб-ускуналарини ўрнатишиб, концерт дастурини бошлаб юборишди.

Биринчи гуруҳ аъзолари қурувчилар, муҳандислар, техник ишчилар, қурилиш майдонидаги туннел қазувчилар билан учрашиб, самимий суҳбат қуришган бўлса, иккинчи гуруҳдагилар Роғун ГЭСи тўғонининг бунёд этилиш жараёни, машиналар зали, қурилиш маркази лабораторияси, шунингдек, туннеллар ҳолати ва бошқа техник-муҳандислик иншоотлари билан яқиндан танишишди.

Тарғибот гуруҳи аъзоларига ҳамроҳлик қилган қурилиш участкалари муҳандислари-ю бошлиқларининг маълум қилишича, айни пайтда, Роғун ГЭСидаги қурилиш ишлари Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмоннинг бевосита топшириқлари асосида юқори сифат ва тасдиқланган режага биноан, олиб борилмоқда экан.

Бевосита қурувчилар билан суҳбатда бўлган шоиру ёзувчилар улар заҳматини юқори баҳолаб, Роғун ГЭСи қурувчиларининг барчаси - замонамизнинг ҳақиқий қаҳрамонлари, Ватанимиз ва халқимизнинг мард ўғлонлари эканликларини бот-бот таъкидлашди. Улар Ватан, миллий ифтихор, баҳор, Наврўзни тараннум этувчи шеърларидан намуналар ўқиб беришди.

Бундан ташқари, юртимизнинг таниқли санъат усталари ва эстрада хонандалари ҳам ўзларининг дилтортар ва жозибали куй-қўшиқлари билан қурувчиларга хуш кайфият улашди.

Шубҳасиз, ушбу тадбир қурувчиларга байрамона кўтаринки кайфият ва янги куч-ғайрат бағишлади. Зотан, бу уларнинг табассум балққан чеҳраларидан намоён эди!

Ёқубжон АБДУМАНОНЗОДА,

Зуҳриддин УМАРОВ,

"Халқ овози".

Душанбе-Роғун-Душанбе.