12 июн куни «Кохи Наврўз» Давлат мажмуасида Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон «Замонавий таҳдид ва хатарлар шароитида устувор тараққиётга эришиш бўйича ҳамкорликларни мустаҳкамлаш» мавзусида олий даражадаги симпозиумда иштирок этди ва нутқ сўзлади.

Бу муҳим халқаро тадбир ишида Бирлашган Миллатлар Ташкилоти Бош

котиби Антониу Гутерриш, бошқа минтақавий ва халқаро ташкилотлар, Душанбедаги дипломатик корпуслар олиймақом намояндалари, таҳлилчилар, мамлакат тегишли вазирлик ва идораларининг масъул шахслари иштирок этишди.

Давлат бошлиғи ўз чиқишида БМТ Бош котибининг Тожикистонга ташрифи ҳамда «Замонавий таҳдид ва хатарлар шароитида устувор тараққиётга эришиш бўйича ҳамкорликларни мустаҳкамлаш» мавзусида олий даражадаги симпозиум ўтказилишини Тожикистон ва Ҳукуматимизнинг устувор тараққиёт йўлидаги саъй-ҳаракатлари ҳамда унинг замонавий муаммолар ва таҳдидларга қарши кураш майдонидаги мустаҳкам мавқеи билан янада кўпроқ ва реал танишишнинг катта имконияти, дея атади.

2030 йилгача давр учун Устувор тараққиёт глобал кун тартибидаги масалаларнинг қабул қилиниши миллионлаб тинч аҳоли диний ва геосиёсий мунозаралар хавфли таҳдидларига рўпара бўлган давр билан тўғри келгани, бугунги симпозиумни ўтказишнинг асосий мақсадларидан бири устувор тараққиёт мақсадларига эришиш, замонавий таҳдидларни бартараф этиш бўйича биргаликдаги ташаббуслар, ҳамкорликлару шерикчиликни мустаҳкамлаш ва ривожлантириш, мустаҳкам тинчлик ва барқарорликни таъминлашдан иборат эканлиги қайд қилинди.

Тожикистон Республикаси Президенти дунёда бирор бир мамлакат бундай вазиятда якка ҳолда муваффақиятга эриша олмаслиги, замонавий таҳдиду хатарларга қарши кураш майдонида хавфсизлик ва барқарорликни таъминлай олмаслигини эслатар экан, халқаро терроризм ва экстремизмга қарши кураш йўлида минтақа ва халқаро даражада биргаликдаги ташаббусларни қабул қилиш орқали глобал хавфсизликни таъминлаш учун ҳамкорликлар ва ўзаро алоқаларни кучайтиришни бу хавфли жарга қулашдан сақланишнинг реал йўналишларидан бири эканлигини айтиб ўтди.

Тожикистоннинг БМТ фаол аъзоси сифатида бу йўналишда дунёнинг муҳим ва мувофиқлаштирувчи рол ўйновчи барча мамлакатлари ва нуфузли халқаро ташкилотлар билан интеграцияни мустаҳкамлашдан манфаатдорлиги қайд қилинди.

Тожикистон Республикаси Президенти ўз чиқиши охирида Тожикистоннинг глобал сув ва экологик муаммоларни ҳал этиш йўлидаги халқаро ташаббуслари ҳақида эслатар экан, сайёрамизнинг барча халқлари манфаатларига йўналтирилган янги Халқаро ўн йилликни амалга татбиқ этиш жараёнида самарали ҳамкорлик ва шерикчилик йўлида жиддий қадамлар ташланишига умид билдирди.

 «Замонавий таҳдид ва хатарлар шароитида устувор тараққиётга эришиш бўйича ҳамкорликларни мустаҳкамлаш» мавзусида олий даражадаги симпозиум давомида Бирлашган Миллатлар Ташкилоти Бош котиби Антониу Гутерриш чиқиш қилиб, Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам     Эмомали Раҳмонга бундай муҳим тадбирни ташкил этганлиги, замонавий дунёнинг муҳим ва долзарб муаммоларини ҳал этиш йўлидаги ҳаракатлари учун миннатдорчилик билдирди.

Шунингдек, симпозиум чоғида Тожикистон Республикаси Ҳукуматининг Устувор Тараққиёт Мақсадларини амалга татбиқ этиш йўлидаги интилишлари ва ютуқлари тўғрисида БМТнинг Тожикистондаги Доимий мувофиқлаштирувчиси хоним Пратибҳа Меҳта, мамлакат Иқтисодий тараққиёт ва савдо вазири Неъматулло Ҳикматуллозода ҳамда бошқа маҳаллий ва хорижий таҳлилчилар чиқиш қилишди.

Симпозиумнинг алоҳида қисмларида иқлим ўзгаришининг Тожикистон тараққиёти ва Устувор Тараққиёт Мақсадларига таъсири, озиқ-овқат хавфсизлигини таъминлаш, Тожикистондаги аграр соҳа ва озиқ-овқат хавфсизлиги: 2030 йилгача давр учун Тожикистон Миллий тараққиёт дастурини амалга татбиқ этиш муаммолари ва имкониятлари ҳамда бошқа масалалар кўриб чиқилди.

«Ховар» ТМАА.