20 март куни "Кохи Наврўз" мажмуасида Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмон халқаро Наврўз байрами арафасида мамлакат зиёлилари билан самимий учрашув ўтказди. Мулоқот аввалида муҳтарам Эмомали Раҳмон йиғилганлар, Тожикистон халқи ва чет элдаги юртдошларимизни Наврўз байрами билан самимий табриклади.

Тожикистон Президенти муҳтарам Эмомали Раҳмон мустақиллик йилларида жаннатмакон Тожикистон халқининг севимли миллий байрамларидан бирига айланган қадимий Наврўзнинг қайта тикланиши ва  унинг ўзига хос хусусиятлари ҳақида сўз юритди.

Давлат бошлиғи Наврўзнинг дунё миқёсида нишонланиши ва кейинчалик башарият аҳлига унинг ўзига хос урф-одатларини таништириш борасида эслатиб, тожик зиёлилари бу қадимий байрамнинг анъаналарини доимий равишда тарғибу ташвиқ этишлари, унинг боқий қадриятларини оммавийлаштириш ва шу йўл билан жамиятимиз ҳаётининг маданий илдизларини такомиллаштириш борасида интилишларига ишонч билдирди.   

Миллат пешвоси муҳтарам Эмомали Раҳмоннинг таъкидлашича, зиёлилар жамиятнинг фаол ва қудратли кучи сифатида миллий ўзликни англашнинг такомиллашишида ўзига хос рол ўйнаб, миллат ҳамда давлат манфаатларини содиқона ва қатъият билан ҳимоя қилишлари мумкин.

2017 йил мамлакат Президенти томонидан Ёшлар йили, деб эълон қилингани боис, Давлат бошлиғи муҳтарам Эмомали Раҳмон зиё аҳли келажак авлод вакиллари ташаббусларини қўллаб-қувватлаб, ҳар бир ёш авлод қалбида миллий ва ватанпарварлик ҳиссини уйғотиб, уларни илм-фан, касб-ҳунар ва азиз Ватанимиз - Тожикистоннинг янада обод ва тараққий этиши йўлида ҳидоят қилишлари лозимлигини таъкидлади. Ёш зиёлиларга янги илмларни ўрганишлари учун яхши шароитлар яратиб бериш борасида мамлакат барча илмий ва таълим тизимлари вазифадор этилди.

Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмоннинг нутқидан сўнг, учрашув иштирокчиларидан бир неча нафар сўзга чиқиб, Миллат пешвосининг ижтимоий тараққиёт, юртимиз зиёлилари ташаббусларини қўллаб-қувватлаганлиги ва мамлакат Ҳукуматининг бошқа яратувчанлик тадбирлари ҳақида фикр билдиришди.

"Ховар" ТМАА.