24 август куни эрталабки соат 6да Тинчлик ва миллий бирлик асосчиси - Миллат пешвоси, Тожикистон Республикаси Президенти Эмомали Раҳмон бошчилигида жамият ҳаёти турли соҳалари зиёлилари намояндалари, ёшлар ва фаоллар минган биринчи поезд пойтахт темир йўл станциясидан Душанбе-Қўрғонтепа-Кўлоб йўналиши бўйлаб ҳаракатга тушди.

Мазкур темир йўли бунёди Давлат бошлиғи иштирокида бошланган бўлиб, унинг лойиҳавий қиймати 165 миллион сомонийдан зиёдни ташкил қилади. Темир йўл лойиҳаси ўз ичига умумий узунлиги 3543 метр бўлган учта туннел қурилишини қамраб олган. Бундан ташқари, лойиҳа доирасида умумий узунлиги 683,2 метр бўлган 8та кўприк қурилган. 

Агар лойиҳанинг иқтисодий аҳамияти ва устунлик жиҳатларига назар соладиган бўлсак, чегарани кесиб ўтувчи Душанбе-Қўрғонтепа темир йўли аввалги узунлиги 432 километрни ташкил қилган. Туннеллар ва кўприклар қурилиши туфайли йўл узунлигини 313 километрга қисқартиришнинг уддасидан чиқилган бўлиб, натижада, бугунги йўл узунлиги 119 километрни ташкил қилади.

Душанбе-Қўрғонтепа темир йўли бўйлаб 1 тонна юк ташиш қарийб 120 сомонийга арзонлашди. Яъни аввал 160 сомонийни ташкил қилган бўлса, эндиликда янги йўналиш бўйлаб 1 тонна юк ташиш 35-40 сомонийга тенгдир.

Мутахассисларнинг маълумотига кўра, Душанбе-Қўрғонтепа темир йўлининг йиллик иқтисодий фойдаси 46 миллион сомонийни ташкил қилиб, бу 10 йилда янги темир йўл линияси қурилиши барча чиқимларини қоплайди.

Тожикистон Республикаси Президенти Эмомали Раҳмон Душанбе-Қўрғонтепа-Кўлоб темир йўли йўналиши бўйлаб ҳаракатланиш чоғида бугун Тожикистон халқи, жумладан, Хатлон вилояти меҳнатсевар аҳолиси учун унутилмас тарихий кун ҳисобланишини таъкидлади. Зеро, муқаддас миллий байрамимиз - Тожикистон Республикаси Давлат мустақиллигининг 25 йиллик байрами олдидан жуда муҳим ижтимоий-иқтисодий лойиҳаларимиздан бири амалга татбиқ этилди.

"Ховар" ТМАА.