Суғд вилояти давлат ҳокимияти ижроия органи мажлислар залида Мустақилликнинг 24 йиллигига бағишланган тантанали йиғин ўтказилиб, унда турли соҳаларда фаолият юритган бир қатор илғор мутахассисларга давлат мукофотлари ва Ифтихорномалар топширилди.

Тантанали йиғилишда мамлакат Бош вазири Қоҳир Расулзода ва вилоят раиси Абдураҳмон Қодирий, вилоят ижроия органи бўлим ва бошқармалари раҳбарлари, шаҳар ва ноҳия раислари, фаоллар ва зиёлилар иштирок этди.

Бош вазир ўз чиқишида вилоят аҳлини мамлакат Президенти номидан давлат Мустақиллигининг 24 йиллиги муносабати билан табриклади.

Суғд вилояти раиси А.Қодирий ҳам йиғилишда ҳозир бўлганлар ва улар орқали барча суғдликларни Мустақиллик куни билан табриклаб, эзгу ниятлар тилади.

Тантанали йиғилиш охирида бир қатор давлат хизматчилари ва турли соҳаларнинг илғор мутахассислари давлат мукофотлари ва Ифтихорномалар билан қадрланди. Жумладан, 12 нафарга “Хизмати шоиста” медали, 1 нафар “Шафқат” медали, 4 нафар Республика Ҳукумати Ифтихорномаси билан тақдирланди.

ЕХҲТ РАҲБАРИ БИЛАН МУЛОҚОТ 

Европада Хавфсизлик ва Ҳамкорлик Ташкилотининг Тожикистондаги раҳбари Маркус Мюллер Суғд вилоятига ташриф буюрди.

Нуфузли ташкилотнинг ўлкамиздаги раҳбари М.Мюллер мамлакат шимолига сафари давомида Суғд вилояти раиси Абдураҳмон Қодирий билан ҳам учрашиб, мулоқот ўтказди.

Вилоят матбуот хизматидан маълум қилишларича, ЕХҲТ вакиллари Тожикистоннинг Европа давлатлари билан ижтимоий ва иқтисодий муносабатлари намунали эканлигини таъкидлаб, икки тарафлама ҳамкорликлар ҳам керакли даражада йўлга қўйилганлигини таъкидлаган.

Ўз ўрнида А. Қодирий ҳам вилоят халқ хўжалиги ҳолати ҳақида маълумот бериб, қишлоқ хўжалигида ерни деҳқонларга тақсимлаш меҳнат муҳожирлари сонини камайтирганлигини айтган. Шунингдек, хотин-қизларни иш билан таъминлаш мақсадида уй меҳнати жорий қилинаётганлигини ҳам айтиб ўтган. 

ЕХҲТнинг Тожикистондаги раҳбари Маркус Мюллер қишлоқ хўжалигидаги ислоҳотлар ва енгил саноат соҳасида қўл меҳнатини жорий қилиш ташаббусларини юқори баҳолаб, шу йўл билан иш жойлари яратиш орқали одамлар ҳаёт тарзи яхшиланишига ишонч билдирган. 

МИЛЛИЙ ЧОЙХОНА ОЧИЛДИ

Давлатимиз Мустақиллигининг 24 йиллиги арафасида Исфаранинг энг узоқ қишлоқларидан бири бўлган Ворухда замонавий услубда қурилган миллий чойхона иш бошлади.

Давлат ҳокимияти Исфара шаҳар ижроия органи ташаббуси ва маҳаллий аҳоли орасидан Шораҳматовлар оиласи елиб-югуришлари билан иш бошлаган мазкур чойхонада оқсоқоллар ва барча меҳмонларга юқори даражада хизмат кўрсатилиши йўлга қўйилган.

Икки қаватли чойхона биносида миллий нақшлар билан безак берилган иккита катта зал ва бошқа хизмат кўрсатиш хоналари мавжуд.

Чойхона фаолият бошлаши баробарида маҳаллий аҳолининг 15 нафари доимий иш жойи билан таъминланди. Чойхона фаолияти кенгайиши билан ишчилар сони ҳам икки баробарга ортиши кутилмоқда.

ЗАМОНАВИЙ ТАБОБАТ МАРКАЗИ

Тожикистон Республикаси давлат Мустақиллигининг 24 йиллигини муносиб кутиб олиш мақсадида юртимиз бўйлаб ободончилик ва яратувчанлик ишлари кенг йўлга қўйилди. Шунингдек, жойларда байрам иншоотлари бунёд этилиб, фойдаланишга топширилмоқда.

Истаравшанлик ишбилармон ва қурувчилар ҳам ноҳия бўйлаб 24 та каттаю кичик ижтимоий ва хизмат кўрсатиш байрам иншоотларини бирма-бир фойдаланишга топширишмоқда. 

Ана шундай иншоотлардан бири беш қаватли Ташхис ва табобат марказидир.

Мазкур марказ маҳаллий ишбилармон Мўъмин Қосимов томонидан 1 миллиону 250 минг сомоний маблағ эвазига қад ростлади.

Масъулларнинг айтишича, бу бино 40 та табобат, жарроҳлик, иш хоналари, дорихона, қабулгоҳ ва беморлар ҳордиқ чиқарадиган хоналардан иборат.

Ўз мухбир.