Яқинда Қўрғонтепа шаҳрида Аҳоли ижтимоий ҳимояси ва соғлиқни сақлаш масалалари бўйича мувофиқлаштирув кенгашининг навбатдаги йиғилиши бўлиб ўтди. Мажлисда юқумли касалликларнинг олдини олиш ва уларни назорат қилиш ҳамда «2016-2020 йиллар учун Тожикистон Республикасида иммунопрофилактика давлат дастури» ижроси масалалари кўриб чиқилди. Йиғилиш иштирокчилари «2011-2020 йиллар учун Тожикистон Республикасида

соғлом турмуш тарзини шакллантириш миллий дастури» ижросини ҳам муҳокама этишди.

Мажлисда Хатлон вилояти раиси ўринбосари Махфират Хидирзода қатнашди ва сўзга чиқди.

- Тиббий хизмат кўрсатишни яхши йўлга қўйишга, айниқса, қишлоқ жойларда бунга катта эътибор қаратиш лозим, - деди М. Хидирзода.

Раис ўринбосари вилоят соғлиқни сақлаш бошқармаси барча муассасаларига мавжуд камчиликларни зудлик билан бартараф этиш топшириғини берди.

Кутубхонага муносиб совға

Хатлон вилояти раиси ўринбосари, фалсафа фанлари доктори, профессор Махфират Хидирзода Шамсиддин Шоҳин номидаги вилоят кутубхонасига «Истиқлолият ва стратегияҳои муваффақ» («Истиқлолият ва муваффақиятли стратегиялар») номли китобидан бир неча нусха совға қилди.

Вилоят кутубхонаси директори Тўтинисо Юсупованинг хабар беришича, китобда турли газета-журналларда чоп этилган илмий мақолалар ҳамда муаллифнинг маҳаллий ва халқаро илмий-амалий конференциялардаги нутқлари тўпланган.

Китоб бугунги кун воқеа-ҳодисалари, жамият ақидаси шаклланиши, жамоатчилик ташкилотларининг мустақиллик, тинчлик ва осойишталикни мустаҳкамлашдаги роли, шунингдек, мамлакатимизнинг халқаро масалалар ечимида тутган ўрни таҳлили билан шуғулланувчилар учун мўлжалланган.

Ходимлар малака оширишди

М. Турсунзода номидаги Тожикистон Санъат ва маданият институти ўқитувчилари Муборак Турсунова, Бозорбой Холов ва Гадобек Маҳмудовлар Шамсиддин Шоҳин номидаги вилоят кутубхонаси ходимлари учун малака ошириш семинари ўтказишди.

Ёшлардан иборат тадбир қатнашчиларига китоб ўқишнинг манфаати, дунёқарашни кенгайтиришдаги аҳамияти, билим олишнинг муҳимлиги, шунингдек, аҳоли билан ишлаш тўғрисида кенг маълумот берилди.

 «Тожикистон – қадрдон ўлкам» намойиши

Янги йил арафасида «Авасто» номли вилоят тарих-ўлкашунослик музейида таниқли суратчи Шуҳрат Ёровнинг «Тожикистон – қадрдон ўлкам» номли суратлар намойиши бўлиб ўтди.

Намойиш ташаббускорлари давлат ҳокимияти Хатлон вилояти ижроия органи, Дўстлик ва маданий алоқалар тожик жамияти ҳамда «Авасто» тарих-ўлкашунослик музейи раҳбарияти бўлди. Тадбирда 100дан ортиқ турли мавзуларга бағишланган суратлар намойишга қўйилди.

Давлат истиқлолияти йилларида оддий кишилар ҳаёти, маданияти, тожик халқи тарихи намойишнинг бош мавзусини ташкил қилди. Шуни ҳам қайд этиб ўтиш ўринлики, Шуҳрат Ёровнинг суратлари намойиши Тожикистоннинг барча гўшалари, шунингдек, Россия, Белорус, Исроил ва Германия каби хорижий мамлакатларда ҳам ўтказилган.

Касбий байрамга бағишланган тадбир

Т. Ўлжабоев номидаги «Норак» гидроэлектростанцияси мажлислар залида энергетиклар касбий байрамига бағишланган тантана бўлиб ўтди. Бу ҳақда, давлат ҳокимияти Норак шаҳри ижтимоий тараққиёт ва жамоатчилик билан алоқалар бўлими мудири Ҳабиба Сафарова журналистларга маълум қилди.

Тадбирда Норак шаҳри раиси Фатҳулло Ҳурматзода, «Барқи Тожик» очиқ шаклдаги ҳиссадорлик холдинг компанияси раисининг биринчи ўринбосари Маҳмадумар Асозода, Тожикистон Республикаси касаба уюшмалари энергетика соҳаси ходимлари комитети техник нозири Гулмурод Холмуродов ва «Бойғози» ГЭСи директори Рустам Зоғаковлар иштирок этишди.

Тадбир жараёнида «Норак» ва «Бойғози» ГЭСларининг 27 нафар фаол ходимларига давлат ҳокимияти Норак шаҳри ижроия органи ва ТХДП Норак шаҳри ижроия комитети ифтихорномалари тақдим этилди. Соҳанинг 30 нафар фаол ёш ходимлари ва фахрийлари пул ҳамда моддий мукофотлар билан тақдирландилар.

Тантанали йиғилишда мустақил Тожикистон учун электроэнергиянинг муҳим миллий бойликка айланганлиги алоҳида қайд этиб ўтилди.

Ўз мухбир.