-Соғлом экологик муҳит яратиш бугунги кунда, нафақат, Тожикистон, балки дунё давлатлари олдида турган энг долзарб глобал муаммолардан бири саналади,- дея қайд этди Тожикистон Республикаси Ҳукумати қошидаги Атроф-муҳитни муҳофаза қилиш комитети раиси журналистлар билан ўтказилган матбуот анжуманида.

Атроф-муҳитни муҳофаза қилиш комитети 2017 йилнинг биринчи ярмида ўз фаолиятини Тожикистон Республикасининг «Атроф-муҳитни муҳофаза қилиш тўғрисида»ги қонуни талаблари асосида йўлга қўйиб, кенг кўламдаги ободонлаштириш ва кўкаламзорлаштириш ишларини амалга оширди.

Жумладан, республика ҳудудида 2 миллион 454 минг 745 туп, шундан бир миллион 331 минг 524 туп сояли, 380 минг 548 туп манзарали, 709 минг 893 туп мевали дарахтлар, 3 миллион 363 минг 954 туп турли гуллар кўчатлари ўтқазилди.

Шунингдек, 578 гектар янги боғлар бунёд этиш, 353 гектар майдондаги эски боғларни тиклаш ишларида фаоллик кўрсатди.

Комитет жамоаси Тожикистон Ҳукумати томонидан олиб борилаётган экологик сиёсатни амалга татбиқ этиш борасида «2009-2019 йилларга белгиланган Тожикистон Республикасининг экологик давлат дастури» ҳамда «2010-2030 йилларга мўлжалланган музликларни ўрганиш ва сақлаш бўйича давлат дастури» ижросига ҳам алоҳида эътибор қаратди.

Давлат ҳокимияти Панжакент шаҳар ижроия органи атроф-муҳитни муҳофаза қилиш бўлими билан ҳамкорликда Зарафшон дарёсининг бир километрдан ортиқ масофасида соҳил мустаҳкамлаш ишлари рўёбга чиқарилди. Бу дарё қирғоғидаги 52 гектар майдон қишлоқ хўжалиги оборотига қайтарилди.

Стандартлаштириш ва экологик меъёрларни ишлаб чиқаришда ҳам комитет ибратли ишларга қўл урмоқда. Комитет ходимлари ва сувшунос олимлари иштирокида «Тожикистонда ер усти сувларини муҳофаза қилиш қоидалари» ҳамда «Тожикистонда ер ости сувларини муҳофаза қилиш қоидалари» қўлланмалари ишлаб чиқилиб, комитет раиси тавсияси билан Адлия вазирлигида қайдга олинди.

Комитет фаолият режасига биноан Миллий бирликнинг ХХ йиллиги ва «Сув устувор тараққиёт учун» 2018-2028 йиллар халқаро амалиёт ўн йиллигини қўллаб-қувватлаш мақсадида, шаҳар ва ноҳиялар ўрта таълим муассасалари ўқувчилари ўртасида «Сув – бу яшил сайёра» мавзусида республика танлови ўтказилди.

Ғолиблар Бутунжаҳон атроф-муҳитни муҳофаза қилиш кунининг 45 йиллигига бағишланган тантаналарда қимматбаҳо совғалар ҳамда дипломлар билан тақдирландилар.

Атроф-муҳитни муҳофаза қилиш комитети жамоаси 148 нафар ходимдан иборат бўлиб, шуларнинг 38,9 фоизини ёшлар ташкил этади. Айни пайтда 21 нафар студент комитет ҳисобидан соҳавий олий ўқув юртларида таҳсил олмоқда. Ёшларни соҳавий ишларга жалб этиш келгусида ҳам давом эттирилади…

Абдуҳафиз МИРЗААҲМЕДОВ, «Халқ овози».