Йил охирлаб, янги – 2019 йил кириб келиш арафасида турар эканмиз, ўтаётган 2018 йил мундарижасига бирров назар ташлаб, унинг ўта хайрли ва баракотли ўтганига амин бўласан, киши.

Йил бошида Тинчлик ва миллий бирлик асосчиси – Миллат пешвоси муҳтарам Президентимиз томонидан жорий йилнинг Сайёҳлик ва халқ ҳунармандчилигини ривожлантириш йили, дея эълон қилиниши ва халқ

ҳунармандларининг солиқдан озод этилиши ортидан мамлакатимизда жуда катта ишлар амалга оширилди.

Республика шаҳру ноҳияларида, шунингдек, хорижда яшовчи ватандошларимиз томонидан қадимий халқ ҳунармандчилигига бағишланган қатор кўргазмалар ўтказилишининг гувоҳи бўлдик. Ўзимизнинг Рўдакий ноҳияси маркази – Сомониён шаҳарчаси ва бошқа қишлоқ жамоатларида ҳам халқимиз ҳунармандчилигига бағишланган қатор тадбирлар бўлиб ўтди. Табиийки, бу тадбирлар қадимий санъат саналган ҳунармандчилигимизга бўлган эътиборимизни қайтадан қаратди.

Сайёҳлик масаласида ҳам шуни айтиш мумкинки, Президентимиз ушбу соҳага алоҳида эътибор бериб, Сайёҳликни ривожлантириш комитети ташкил этгани ва соҳани ривожлантиргани барчага манзур бўлди. Зеро, сайёҳлик бутун дунёда сердаромад соҳалардан бири саналади. Азиз ватанимиз Тожикистон эса, ўзининг саёҳатбоп масканлари, кўллари-ю томошабоп манзарали жойларга бойлиги билан азалдан машҳур.

Айниқса, зиёрат туризми мусулмон оламида алоҳида ўрин ишғол этиб, бу борада ҳам юртимизда жуда кўп зиёратгоҳлару улуғ авлиёлар оромгоҳлари мавжудлиги билан мақтанса арзигулик.

Ўтиб бораётган йил мундарижасидаги яна бир ажиб воқеага тўхталмасдан илож йўқ. Бу – 9-10 март кунлари қўшни Ўзбекистон Республикаси Президенти муҳтарам Шавкат Мирзиёевнинг Ватанимизга давлат ташрифи билан келиши ва Тинчлик ва миллий бирлик асосчиси –Миллат пешвоси, Тожикистон Республикаси Президенти муҳтарам Эмомали Раҳмон Жаноби олийларининг 17-18 август кунларидаги Ўзбекистонга айлаган давлат ташрифини йилнинг улкан тарихий воқеалари сирасига киритиш мумкин. Иккала мамлакат президентларининг инсонпарварлик, дўстлик ва яхши қўшничилик принциплари ғояларига содиқ эканликлари тарихи қадим-қадимларга бориб тақалувчи икки халқ дўстлиги-ю муҳаббатининг ошишига ва чексиз қувончларига сабаб бўлди.

«Роғун» ГЭСи илк агрегатининг кўп сонли олийқадр меҳмонлар, дипломатик корпуслар намояндалари ва оммавий ахборот воситалари вакиллари иштирокидаги йиғинда муҳтарам Президентимиз томонидан ишга туширилиши йил мундарижасидаги яна бир улкан воқеадир.

«Роғун» ГЭСининг ишга туширилиши мамлакатимиз Ҳукуматининг ўз олдига қўйган озиқ-овқат хавфсизлигини ҳимоялаш, коммуникацион боши берк кўчадан чиқиш ва энергетик мустақилликка эришиш каби уч асосий стратегик мақсадга эришилганидан дарак берди. Ушбу улкан воқеа юз берган кунларида халқимиз шодлигининг чегараси бўлмай қолди. Барча давлатимиз бошлиғи ҳақида тинмай дуойи хайр қилишди.

Қўлга киритилган ва киритилаётган барча соҳалардаги ютуқлару муваффақиятларимиз муҳтарам Президентимиз шарофатидандир, албатта. Зеро, подшоҳ салоҳияти раъийят (халқ) салоҳияту ободончилиги демакдир.

Янги – 2019 йил арафасида турар эканмиз, Парвардигори азимуш-шаъндан уни-да халқимиз учун хайрли, файзли-баракотли, тинч ва осойишта айлашини сўраб дуо қиламиз. Азиз Ватанимиз бундан-да ободу зебо бўлиб, барчамизни ҳамиша Яратганнинг лутфу марҳаматига ноил бўлишликка муяссар айласин.

Саиджон АЗИЗОВ,

Рўдакий ноҳияси, Сомониён шаҳарчасидаги Эшони Авлиё бобо номли масжид имом-хатиби.