Ғончи ноҳияси Ваҳдат жамоатига қарашли Овчи қишлоғида 150 гектар ер суғориш суви билан таъминланди.

Овчи қишлоғидаги Кемқўлсой мавзесидаги полиз суви тармоғи тикланиб, бекор ётган ерларда деҳқончилик қилиш имконияти яратилди.

Давлат ҳокимияти вилоят ижроия органи қўллаб-қувватлаши

ва «Овчии Ғончи» кооперативи аъзоларининг ҳисса қўшишлари натижаси ўлароқ тоғ этагидан экин ерларигача 5 километр масофада ҳашар йўли билан полиз экинлари учун сув қувурлари тортилди. Бу сув тизими орқали қишлоқнинг яна 150 гектар ер майдони сув билан таъминланади.

Бу хайрли ишлар учун 720 000 сомоний маблағ сарфланган бўлиб, унинг 50 фоизи ҳиссадорлар ва деҳқонлар ҳисобидан жамғарилган, қолган 360 000 сомонийси вилоят бюджети ҳисобидан ажратилган.

«ИСТАМБУЛ-ХЎЖАНД» АВИА ЙЎНАЛИШИ ИШГА ТУШДИ

Хўжанд халқаро аэропортига Турк ҳаво йўлларининг биринчи рейси – «Истамбул-Хўжанд» самолёти келиб қўнди.

BOING 737 800 самолётида Туркиядан келган меҳмонларни Суғд вилояти раиси ўринбосари Заробиддин Файзуллозода ва Хўжанд халқаро аэропорти директори Маъруф Маҳмудзода тантанали равишда кутиб олишди ҳамда рамзий лентани кесишди.

Туркиянинг Тожикистондаги элчиси Меҳмет Саид Хўжанд-Истамбул ҳаво йўналишининг очилиши икки давлат иқтисодий ривожига салмоқли ҳисса қўшишини таъкидлади.

Туркиянинг «Turkish» авиакомпанияси 1933 йилда ташкил этилган бўлиб, дунёдаги энг яхши авиакомпаниялардан бири ҳисобланади.

Дунёнинг 110 мамлакатига рейс уюштирган бу ширкат Тожикистонда Душанбе шаҳридан кейинги энг катта шаҳар бўлмиш Хўжандга ҳам ҳаво йўллари бўйича рейс ташкил этди.

Биринчи босқичда бу йўналиш бўйича ҳафтада икки марта рейс ташкил этилиб, Истамбулдан Хўжандга ва қайтиб кетиш махсус нарх, яъни, барча солиқ тўловлари билан 352 АҚШ долларига тўғри келади.

ДОВОН ФОЙДАЛАНИШГА ТОПШИРИЛДИ

Оббурдон довони орқали Тоғли Мастчоҳ-Ғончи транспорт йўли таъмирдан чиқарилиб, расмий равишда фойдаланишга топширилди.

Оббурдон довони орқали Тоғли Мастчоҳ ноҳияси ва Айний ноҳиясининг бир неча қишлоқлари вилоятнинг бошқа минтақаларига борди-келди қиладилар.

Бу йўлнинг кўпгина минтақалари сўнгги бир неча йилда тоғ кўчкиси тушиши натижасида бузилиб, транспорт воситалари ҳаракати учун хавфли бўлиб қолганди. Вилоят бюджетидан мазкур йўлни таъмирлаш учун 100 минг сомонийдан кўпроқ маблағ ажратилиб, мазкур йўл таъмирдан чиқарилди.

Ўтган асрнинг 80-йилларидан буён фойдаланилаётган Оббурдон довони йўли ҳаммаси бўлиб, 50 километрни ташкил қилади. Тоғли минтақаларда яшовчилар ушбу йўл орқали июн ойидан ноябр ойигача қатнайдилар.

Мазкур йўлдан қатнаш йўловчилар масофасини қарийб 100 километрга қисқартиради.

Ўз мухбир.